అయ్యో....... రామచంద్రా.....!!

రాష్ట్ర దేవాదాయ శాఖ మంత్రి రామచంద్రయ్య వ్యాఖ్యలు, ప్రసంగాలు భలే కామెడి గా
అనిపిస్తున్నాయి. బాగా సీనియరే. అనుభవం పుష్కలంగా వున్నమనిషే. మరెందుకిలా
మాట్లాడుతున్నాడో అర్ధం కావటం లేదు. ఒక రాష్ట్ర ముఖ్యమంత్రిగా కిరణ్ కుమార్ రెడ్డి
పనిచేస్తున్నాడు. మంచో చెడో ఏదో తిప్పలు పడుతున్నాడు. అదే క్యాబినెట్ లో రామ
చంద్రయ్య ఒక మంత్రిగా వున్నాడు. అలాంటిది.... తెల్లారిలేస్తే " చిరంజీవి గొప్పవాడు ....
అలాంటి నాయకుడుగానీ, అంతటి చెరిష్మా వున్న నేత గానీ కాంగ్రెస్ లో లేడు  " అని
ఒకసారి, " చిరంజీవిని రాష్ట్ర ప్రజలు ఇంకా ఉన్నత పదవిలో చూడాలని అనుకుంటున్నారు " అని మరోసారి, " ముఖ్యమంత్రి కాదగ్గ అన్ని అర్హతలు చిరంజీవి లో వున్నాయి " అని ఇంకోసారి రోజుకో
రకంగా మాట్లాడుతున్నారు. మరో క్యాబినెట్ లో ఉంటూ ముఖ్యమంత్రి పై విమర్శల
వర్షం కురిపిస్తున్నారు. అంటే కిరణ్ కుమార్ వెంటనే పదవి లోనుంచి దిగి ఆ సీటు
చిరంజీవి కి ఇచ్చెయమనా రామచంద్రయ్య ఉద్దేశ్యం.. ఇది క్రమశిక్షణ అనిపించు
కుంటుందా.....?ఎవరు ముఖ్యమంత్రి కావాలనేది రామచంద్రయ్య నిర్ణయిస్తారా ?
వాళ్లకు అధిష్టానం అంటూ ఒకటి వుంది కదా !ఎవరో సామాన్య కార్యకర్త మాట్లాడినట్టు
బాధ్యత గల మంత్రి మాట్లాడటం భావ్యమా ? ఎంత చిరంజీవి గారికి ఆనందం కలిగించాలనే
సంకల్పం వుంటే మాత్రం ఇలా తేలికగా మాట్లాడతారా ? ఏవిటో.... ఎవరు ఏం
మాట్లాడుతున్నారో, ఎందుకు మాట్లాడుతున్నారో , ఎవరు మాట్లాడిస్తున్నారో పెరుమాళ్ళు
కెరుక.... అంతా విష్ణుమాయ !!