పదికోట్లిస్తే మాత్రం...,!

       సుబ్బరామిరెడ్డి గారు మంచి మనిషి. సాధ్యమయినంత వరకు వివాదాలకు దూరంగా వుండే నాయకుడు. మరెందుకో సడెన్ గా పది కోట్లు ఖర్చు పెట్టి తాజాగా ఓ వివాదాన్ని కొనితెచ్చిపెట్టుకున్నారనిపిస్తోంది. తెలుగు లలిత కళా తోరణానికి ముందు రాజీవ్ గాంధి పేరు తగిలించి అనవసరంగా తేనెతుట్టె కదిలించారనిపిస్తోంది. స్వర్గీయ రామారావు గారి మదిలో మెదిలిన ఒక అద్భుతమయిన ఆలోచనకు సాదృశ్యరూపం తెలుగు లలిత కళాతోరణం, ఒక విధంగా అప్పట్లో ఇది సంచలనం. దీనికి ముందు రాజీవ్ గాంధి పేరు పెడితే పదికోట్లు ఇస్తానని సుబ్బరామి రెడ్డి గారు ఆఫర్ ఇవ్వటం,,,రాష్ట్ర ప్రభుత్వం వెంటనే ఒకే అనటం జరిగిపోయాయి. సహజంగానే ఇది ఎన్, టి. ఆర్, అభిమానులతో పాటు తెలుగు వాళ్ళు చాలామందిని బాధ పెట్టింది. లలితకళలకు సంబంధించిన ఒక థియేటర్ కు  తెలుగు కళాకారుడి పేరు కాకుండా ఒక రాజకీయనాయకుడి పేరు పెడితే పదికోట్లు ఇస్తానంటూ ఎవరయినా ముందుకు వస్తే సర్కారు ఎలా ఒప్పుకుందనేది అర్ధంకాని విషయం. అవునులెండి...కళాకారుడి పేరు పెడితే పదికోట్లు ఎవరిస్తారు చెప్పండి.,,విమానాశ్రయానికి ఎన్టీయార్ పేరు తీసేసి రాజీవ్ గాంధి పేరు పెట్టారంటే అందులోని రాజకీయాన్ని అర్ధం చేసుకోగలం.,, కాని తెలుగు అన్న పదం ముందు రాజకీయ నాయకుడి పేరు అవసరమా అన్నది అర్ధం కాని అంశం. కావాలనుకుంటే ఆ రోజునే రామారావు గారు ఈ ప్రాంగణానికి ఎన్టీయార్ తెలుగు లలిత కళా తోరణం అని  పెట్టి ఉండవచ్చు. దీనికే కాదు అప్పట్లో దాదాపు అన్నిటికి తన పేరు ముందు పెట్టుకున్నా రామారావు గారిని ఎవరు అడిగివుండేవారు కాదు..అడిగినా ఆయన లెక్క చేసే మనిషి కూడా కాదు. కాని ఆయన తన హయాంలో దాదాపు అన్నింటికీ తెలుగు అనే పేరు పెట్టేందుకే ప్రాధాన్యం ఇచ్చారు,, దటీజ్ ఎన్టీయార్..ఆ సమయంలో రామారావు గారి తెలుగు మమకారం మీద బోలెడన్ని జోకులు కూడా వచ్చినాయి.

       నాకు తెలిసి రాజీవ్ గాంధి గారి కంటే కళలు సాహిత్యాలకు సంబంధించి సుబ్బరామిరెడ్డి గారి పేరు గొప్పది,,.హాయిగా ఆ పదికోట్లేదో ఇచ్చి తన పేరు పెట్టుకున్నా సుబ్బరామిరెడ్డి గారిని తెలుగు వాళ్ళందరూ తెగ మెచ్చుకునే వాళ్ళేమో.,, లేదా మన రాష్ట్రంలో ఎంతోమంది గొప్ప గొప్ప తెలుగు కళాకారులు< సాహితీవేత్తలు వున్నారు. వాళ్ళెవరి పేరయినా పెట్టి వున్నా బావుండేదేమో.. తెలుగు లలితకళా తోరణంలో తెలుగు కార్యక్రమాలు జరగటం లేదు కాబట్టి రాజీవ్ గాంధి పేరు పెట్టటంలో తప్పు లేదంటున్నారు  సుబ్బారామిరెడ్డి గారు.,,ఆంద్రప్రదేశ్ లో కేవలం తెలుగు వాళ్ళే కాదు..అన్ని భాషలవాళ్ళు ఉన్నారు. అంతమాత్రాన ఓ వెయ్యి కోట్లు ఇచ్చి రాజీవ్ గాంధి ఆంద్ర ప్రదేశ్ అనో, రాహుల్ గాంధి ఆంద్ర ప్రదేశ్ అనో మార్చలేము కదా.,,రాష్ట్రంలో రోడ్లు,భవనాలు, జిల్లాలు, పార్కులు, అన్నీ రాజకీయ నాయకుల పేర్లతో మారిపోతున్నాయి. కనీసం లలిత కళల జోలికి అయినా వీళ్ళు రాకుండా వుంటే బావుండునన్నది ఓ కళాకారుడిగా నా ఫీలింగ్., సుబ్బరామిరెడ్డి గారికి ఎందుకు ఆలోచన రాలేదో నాకు తెలియదు గాని ఆ పది కోట్లు ఇచ్చి రాజీవ్ గాంధి గారి పేరు బదులు ఎన్.టి.ఆర్.తెలుగు లలితకళా తోరణం అని పెట్టి వుంటే తెలుగు వాళ్ళు పార్టీలు, రాజకీయాలకు అతీతంగా ఆయనకు బ్రహ్మరధం పట్టి వుండే వాళ్ళు., అయినా ఈ మాత్రం సుబ్బరామిరెడ్డి గారికి తెలియదా...ఆయన మనసులో ఇంకా ఏదో గొప్ప ఆలోచన వుండే వుంటుంది...ఒక్కటి నిజం...నా దగ్గర డబ్బు వుండి వుంటే కచ్చితంగా సుబ్బరామిరెడ్డి గారి పేరు పెట్టివుండే వాణ్ని...ఆయనంటే నాకు అంతఇష్టం,,, ఎవరయినా ఓ పదికోట్లు అప్పిస్తే బావుణ్ణు,,,,!